sábado, 29 de septiembre de 2012

Granxa O Cancelo: leite pasterizado e xeados artesáns

A semana pasada incorporouse a Abertos ao Galego unha nova empresa: Granxa O Cancelo, unha granxa situada no Concello de Miño que produce leite e xeados artesáns. 
As empresas de Abertos ao Galego.- Granxa O Cancelo: leite pasterizado e xeados artesáns
 
 
A Granxa O Cancelo (www.facebook.com/granxaocancelo) é un dos proxectos da Cooperativa Agraria Provincial da Coruña (CAP Coruña, www.capcoruna.com). O proxecto retoma en 2009 unha granxa abandonada en Bemantes, Miño, co obxectivo de traballar a prol do sector lácteo, producindo leite de calidade e conectando a produtoras e produtores  coas consumidoras e consumidores do xeito máis directo posíbel. 
 
 
Esta semana, Abertos ao Galego estivo de visita na Granxa O Cancelo para coñecer a súa forma de traballar e os seus produtos. Ademais de mostrarnos as súas instalacións, explicáronnos que utilizan técnicas de produción que  permiten obter os mellores rendementos garantindo un uso responsábel e sostíbel dos recursos, o benestar das vacas e as boas condicións de traballo para as persoas. 
 
 
A Granxa está situada no Cancelo, no concello de Miño. Teñen 95 vacas, que son alimentadas con forraxes producidos principalmente nas terras que rodean a granxa, complementados con cereais que mercan en empresas galegas. Despois de muxir, o leite é pasteurizado e almacenado en recipientes especiais. Unha parte do leite véndena á industria, mais reservan unha parte para a venda directa. 
 
O leite que comercializan directamente distribúese por transporte refrixerado ás máquinas expendedoras que teñen en distintas vilas da comarca, mais tamén o levan embotellado a cafetarías, restaurantes e pequenas tendas.
 
Ademais do leite, desde 2011 a Granxa O Cancelo elabora tamén os seus xeados artesáns. O ingrediente principal destes xeados é o leite recén muxido na propia granxa, ao que engaden ingredientes de produtores maioritariamente galegos. Algúns dos seus sabores son o de amorodos, o de turrón, o de chocolate ou o de licor café. Para elaborar os xeados contan con licor café de Adegas Coto de Gomariz, kiwis de Kiwi Atlántico, castañas de Caurelor ou froitas de Gueixade.  
 
Os produtos que vende a Granxa O Cancelo están etiquetados integramente en galego, ademais de que é a lingua na que se desenvolven as relacións laborais e toda a documentación interna e externa da empresa. A elección da lingua, segundo nos comentaron Pura e Bri, foi unha cuestión obvia, pois o galego é a lingua habitual neste sector, ademais da lingua da maior parte dos traballadores e traballadoras da Granxa. 
 
Deixámosvos os puntos de venda do leite fresco: http://capcoruna.com/leite/ e dos xeados artesáns http://capcoruna.com/xeados/ e recomendámosvos que os probedes!

jueves, 13 de septiembre de 2012

V LIMPEZA SIMULTÁNEA DOS RÍOS GALEGOS

 30 de setembro, domingo
limpeza.jpgEn ADEGA e o Proxecto Ríos votamos a mollarnos polos ríos, poñemos as botas e tentaremos deixalos libres do lixo que segue a aparecer nas nosas ribeiras e ríos. Queremos uns ríos limpos, queremos poder disfrutar dos nosos sistemas fluviais e queremos concienciar á sociedade da necesidade de que estes estén ben conservados.
Este ano será xa a V Limpeza Simultánea en ríos de toda Galiza, que se celebrará o domingo 30 de setembro. Nuns dias poderedes consultar toda a información na páxina web http://limpeza.proxectorios.org/.
Como en anos anteriores o Proxecto Ríos entregará aos grupos participantes un protocolo para difundir a limpeza ecolóxica e respectuosa dos ecosistemas fluviais, ademais de editar cartaces divulgativos para cada zona cun teléfone de contacto para que se apunten as persoas que queiran participar.
É fundamental nesta xornada a implicación dos concellos, para que garantan a recollida do lixo extraído, e axudar co material necesario así coma cos seguros. Animamos aos participantes a pesar o lixo retirado e a difundir no propio concello a idea de que o río non é un vertedoiro.
As persoas que queiran participar nesta actividade deberán anotarse previamente chamando ao teléfone do/a coordenador/a de cada zona  (difundirémolos en breve), ou dende xa ao local nacional de ADEGA (981 570099).